બનાસકાંઠા જીલ્લાના આદિજાતિ બાહુલ્ય ધરાવતા દાંતા તાલુકાના અંતરીયાળ વિસ્તારોમાં પ્રાચીન નગરીના અવશેષો હોવાની લોક વાયકાઓ સ્થાનિક લોકો દ્વારા જાણવા મળે છે. આદિજાતિ વિસ્તારમાં સાંસ્કૃતિક વારસા તરીકે સચવાયેલ દાંતા તાલુકાના રંગપુર-કાંટીવાસ ગામમાં રામ દરબાર અને પ્રાચીન શિવ મંદિર આવેલ છે.
[google_ad]
દાંતા તાલુકાના પ્રવાસ દરમિયાન બનાસકાંઠા જીલ્લા કલેક્ટર આનંદ પટેલે રંગપુર-કાંટીવાસ અને ડુંગરાળ વિસ્તારના પૌરાણિક સ્થળોની મુલાકાત કરી હતી. આ વિસ્તારના સાંસ્કૃતિ વારસા અને આ મંદિર સમૂહના પુનઃ નિર્માણ માટે બનાસકાંઠા કલેક્ટર આનંદ પટેલે રાજ્ય સરકારમાં દરખાસ્ત કરી છે.
[google_ad]
ગુજરાત રાજ્ય પવિત્ર યાત્રાધામ વિકાસ બોર્ડ હસ્તકની યોજનાઓ અંતર્ગત પુનઃ નિર્માણ માટે બોર્ડની ટીમ દ્વારા મુલાકાત લઇ સ્થાનિક સર્વે કરવા અંગે બનાસકાંઠા કલેક્ટરે સચિવ ગુજરાત પવિત્ર યાત્રાધામ વિકાસ બોર્ડ-ગાંધીનગરને તા. 19 ઓગષ્ટ-2021ના રોજ દરખાસ્ત મોકલી છે.
[google_ad]
બનાસકાંઠા કલેક્ટર આનંદ પટેલની મુલાકાત દરમિયાન રંગપુર-કાંટીવાસ ગામના ડુંગરાળ વિસ્તારમાં ઝાડી-ઝાંખરા વચ્ચે અંદાજીત 100 મીટરના વિશાળ વિસ્તારમાં ભવ્ય પૌરાણિક મંદિરોના સમૂહના અવશેષો જાવા મળ્યા હતા. આ અવશેષો પૈકી અનેક કલાત્મક શિલ્પ સ્થાપત્યો અને દેવી મૂર્તિઓ ઝાડી-ઝાંખરામાં ધ્વસ્ત અવસ્થામાં વેર-વિખેર પડેલ જણાઇ હતી.
[google_ad]
બાહ્ય આક્રમણકારો દ્વારા પાટણ પરની ચડાઇ દરમિયાન પ્રાચીન માર્ગમાં આવતાં હીન્દુ ધર્મસ્થળ તરીકે આ મંદિર સમૂહોને ધ્વસ્ત કરી હોવાની સંભાવના છે. હાલમાં આ અવશેષો અંતરીયાળ અને ઝાડી-ઝાંખરાવાળા વિસ્તારમાં પડેલ હોઇ ઘણા-ખરા અંશે સચવાયેલા છે. આ કલાકૃતિઓ અને સ્થાનિક લોકોની માન્યતાઓને ધ્યાને લઇએ તો રામ દરબાર મંદિર સમૂહ જણાય છે. આ જ ગામમાં રામ દરબાર મંદિર સમૂહ પાસે પૌરાણિક શિવ મંદિરના ભગ્ન અવશેષો પણ આવેલા છે. જેને પણ ધ્વસ્ત કરવામાં આવેલ હોવાનું સ્પષ્ટ જણાય છે.
[google_ad]
દાંતા તાલુકો રાજ્યના વિકાસશીલ તાલુકાઓ પૈકીનો આદિજાતિ વસ્તીની બહુલતા ધરાવતો તાલુકો છે. ત્યારે આ મંદિરોના પુનઃ નિર્માણની કામગીરીથી આ વિસ્તારમાં આવેલા પૌરાણિક સાંસ્કૃતિક વારસાના જતન ઉપરાંત આવનારા સમયમાં યાત્રિકોની અવર-જવર થતાં પ્રવાસન વિકાસ અને સ્થાનિક સ્તરે રોજગારીની નવી તકો નિર્માણ પામશે તેમ બનાસકાંઠા કલેક્ટર કચેરી દ્વારા જણાવાયું છે.
From – Banaskantha Update
