શુક્રવારના રોજ પાટણ જિલ્લાના તાલુકા મથક હારીજ નજીક રોડા ગામના માર્ગ પરથી પુર ઝડપે અને ગફલતભરી રીતે પસાર થઈ રહેલા લોડિંગ ડમ્પર ગાડીનાં ચાલકે માર્ગ પરથી પસાર થતાં રાહદારી દંપતીને હડફેટમાં લઈને બન્નેનાં ધટના સ્થળે મોત નિપજાવી ગાડી ચાલક પોતાની ગાડી ઘટના સ્થળે મુકી નાસી છુટયો હોવાનું જાણવા મળ્યું છે.
શુક્રવારના રોજ ધધાણા ગામે આવેલા ડાભી વાસમાં રહેતા ઠાકોર લખાજી શંકરજી ડાભી કે જેઓ પોતાના પરિવાર સાથે હારીજનાં રોડા ગામે ખેતી કામ કરી પોતાનો જીવન નિર્વાહ ચલાવી રહ્યાં હતા. ત્યારે શુક્રવારના રોજ રોડા બસ સ્ટેશનથી તેઓ પોતાની પત્ની સાથે ચાલીને આવતા હતા. ત્યારે માર્ગ પરથી પુરઝડપે અને ગફલતભરી રીતે આવી રહેલા લોડીંગ ડમ્પર ગાડીનાં ચાલકે પતિ-પત્નીને હડફેટમાં લેતા ઘટના સ્થળે જ લખાજી શંકરજી ડાભી તથા તેમના પત્ની નું ગંભીર ઈજાઓના કારણે મોત નિપજ્યું છે.
અકસ્માત સર્જાતા ડમ્પર ચાલક પોતાનું ડમ્પર ઘટના સ્થળે મુકી નાસી છુટયો હતો. તો બનાવના પગલે લોકોના ટોળે ટોળા ઘટના સ્થળે ઉમટી પડ્યા હતા. અને અકસ્માતની પોલીસને જાણ કરાતા પોલીસે ઘટના સ્થળે દોડી આવી બન્ને મૃતકના સ્થળ પંચનામા કરી લાશને પીએમ અર્થે મોકલી આગળની કાયૅવાહી હાથ ધરી હતી. હારીજ નજીક રોડા બસ સ્ટેશન પાસે સજાયેલા અકસ્માતમાં પતિ-પત્નીનાં મોતને પગલે પરિવારજનોમાં ગમગીની છવાઈ જવા પામી હતી.
હારીજ પી.એસ.આઇ. એસ.બી.સોલંકીના જણાવ્યા મુજબ ડમ્પર ચાલક ઘટના સ્થળે ડમ્પર છોડી ભાગી ગયો હતો. જેમાં ડમ્પરને કબજે કરી હારીજ પોલીસ સ્ટેશને લાવવામાં આવ્યુ છે. તથા ડ્રાઇવરને પકડવાની તજવીજ હાથ ધરવામાં આવી છે.
From – Banaskantha Update