દંપતિને ગંભીર ઇજાઓ પહોંચતા સારવાર અર્થે ડીસાની સિવિલ હોસ્પિટલમાં ખસેડાયા
ડીસા-રાધનપુર નેશનલ હાઇવે પર આવેલ ખેંટવા ગામ નજીક સોમવારે અચાનક રસ્તા વચ્ચે ગાય આવી જતાં છકડો રીક્ષા ચાલકને અકસ્માત સર્જાયો હતો.
અકસ્માતમાં રીક્ષા પલ્ટી ખાઇ જતાં તેમાં બેઠેલા દંપતિને ગંભીર ઇજાઓ પહોંચતા સારવાર અર્થે ડીસાની સિવિલ હોસ્પિટલમાં ખસેડાયા હતા.
આ અંગેની વિગત એવી છે કે, રખડતા ઢોરના કારણે માર્ગ અકસ્માતમાં દિન-પ્રતિદિન વધારો થઇ રહ્યો છે. ડીસા-રાધનપુર નેશનલ હાઇવે પર પણ સોમવારે રખડતા ઢોરના કારણે વધુ એક અકસ્માતની ઘટના બની છે.
જેમાં ડીસા તાલુકાના વાહરા ગામમાં રહેતાં બાબુભાઇ દેવીપૂજક અને તેમની પત્ની ધનીબેન દેવીપૂજક ખેંટવા ગામથી વાહરા તરફ જઇ રહ્યા હતા.
તે દરમિયાન અચાનક રસ્તા વચ્ચે ગાય દોડી આવતાં તેમણે સ્ટેયરીંગ પરથી કાબુ ગુમાવતા અકસ્માત સર્જાયો હતો. અકસ્માતમાં રીક્ષા પલ્ટી ખાઇ રોડ પર પટકાતાં તેમાં બેઠેલા દંપતિને ગંભીર ઇજાઓ પહોંચી હતી.
108 એમ્બ્યુલન્સ વાન મારફતે બંને ઇજાગ્રસ્તોને સારવાર અર્થે ડીસાની સિવિલ હોસ્પિટલમાં ખસેડાયા હતા. જ્યારે રખડતા ઢોરના કારણે સર્જાયેલા અકસ્માતથી રીક્ષા માલિકને મોટું નુકશાન વેઠવું પડયું છે.
From-Banaskantha update
